english

Intrada

Da Capo ’76

Tutti

Sineur Bb

A Vue

WEb

Metrum

Requiem

Eine potpourie van ònreigelmaotig samegesjtelde opmaote
oet de rieke historie van Tisniksentwurtniks


29-2-1976
Vastelaoveszòndig. Oprichting van de kapel Tisniksentwurtniks door o.a. Ton Hoofwijk, Jos Kamps, Lei van Rooij, Nico Jessen en Chris Nohlmans biej Kefee “t Dortvaat” in Zitterd. Doel: ’t oploestere van de vastelaovesactiviteite van de Buurt Riekswaeg Noord.
Bedènker van de naam: Hay Houben.



12-7-1976
Eesjte aopenbaar optrae oppe 50ste verjaordig van Sjang Jessen. Suksesnummer: Rucki-Zucki in ein eige arrangement van Jos Frusch. Wiejer vööl vastelaovesrippetoire. Eesjte groepsfoto.



12-2-1979
Oetruiping Chris Nohlmans tot Prins Chris II van Zitterd.
Eesjte en, wie ’t zich noe leet zeen, ouch de lètste Sjtadsprins van Tisniksentwurtniks. “Es ich dich neit hauw” en “Kleine Keffee van Sjaak Nohlmans” ware de aktueel sjlaagesj.

1980-1985
Dees periode haet zich mitname gekenmerk door ’t opboewe van ein, mee es batig, kassaldo, ’t oploestere van de Grillfahrten biej Lei Titselaer in Sjeerwauwere, ’t bezuik aan de Bundesgartenshow in Bonn same mit de Club Wovan, en de aansjaf van Gries Sjieliekes en Roo Kervatte (sjwarte bòkse hauw jederein zelf, sjwarte sjoon nog neit) en de surpriseaovende in de Sjporthal biej Johnie Thimister.

Fibberwarie 1986
Ramspoed Dordrecht. Eesjte Nationale Konkoersdeilname, en òs eesjte gezamelik Mac-Donalds bezuik oppe Coolsingel in Rotterdam. Sjang sjprouk de legendarische weurd: “Jòng doog mich eine nassibal…” Publiekspries gewònne en e paar ervaringe rieker.



14-6-1992
Nederlands Kampioen oppe “Bemmelse Dweildag” Open Nederlandse Kampioenschappen voor Dweilorkesten. Os creatie “Goud” sjloug goud aan biej de Boerekeil-minded Hollenjesj. Rippetwaar besjtòng o.a. oet: “Gold” van Spandau Ballet, Goldfinger en Money, Money, Money.

Fibberwarie 1993
Ööpeningsact op ’t Watersnood Benefiet Concert in ’t MECC, mit o.a. Andre Rieu, Rowwen Heze, Sjef Dietere en jao… ouch Trööt in de Gööt.
’t Taengesjtuure van Lejao B biej de sjlip-pertiej oppe Nuuj Maasbrök waar weergaloos.

September 1994
Oetbrènge van de eesjte CD “neitgoudsjang” mit es top-hit… “Toen wij van Rotterdam vertrokke.”

24-2-1995
Ööpeningsconcert veur de Oeteldonkse Vastelaovend in Kefee ’t Pumpke in Den Bosch. Dit nao aanleiding van ’t sukses van ooze 1e CD. Kedengedenge-Kaatje wurt unaniem oetgeroupe tot ’t aller-aller sjoonste fenmaedje van “tisniks” ooit. (CD kedoo gegaeve mer noooooooit mee get van geheurd.)

31-12-1996
Oploestere van ’t Aut op Nuuj fees in Hotel Winselerhof (van Camille Oost-Westwegel) mit o.a. Ted de Braak, en naoderhandj veur teen guije lekker aan de “Uitjes-Monegasque” biej de Sjluppejes.

22-2-1998
22-jaorig besjtaonsjubileium. Eerepries biej de groote waages in d’n optoch mit Buurt Riekswaeg Noord, mit es motto:
Geine Vastelaovend zonger fanfaar of zaate hermenie, zonger Meziek of Melodie, want laevende meziek beteikent veur de Vastelaovend mee, es eine Sjoebox of CeeDee.

18-11-1999
Deilname aan de Smartlappen Route in Utrecht ein mini-concertje gegaeve in Zaal-Tivoli, same mit Ome Cor en Lange Lex. Rippertwaar o.a. Castor Oh Castor, Ome Cor, da’s gezelligheid en Oh Oh Den Haargh.

8-13 meert 2001
Optraee (mit dank aan Hardy Mertens wie bliek… veur ziene muzikale kiek…) biej de Dutch-Club in ’t Holland House in Singapore mit o.a. Arie Ribbens (en nog 9.21 menuute gebeld mit de mobiele tillefoon van Servé.)

Paosjzòndig 2003 Feria de Paques
Ontvangs in ’t Hotel de Ville, oppe Place de la Republique in Arles. Veur alle muzikale verdeinste kreege veer oet henj van de burgemeister en de veurzitter van ’t Comité de «Medaille d’Honneur du Comite de la Feria Arles».
Vanaaf doe weite veer waat ’t is om zich verpòpzak te vuile.

4-9-2005
Benno M. sjut zich zellef tot Keuning van Tisniksentwurtniks. Robbie V., Achim H. en Bart B.höbbe ’t naokieke.

18-8- 2007
Serve J. zit 15 jaor in Kefee ’t Sjterfhoes en hiltj d’r ein archief aan kleijer, patsje, pertieje, tròmmeklöppele, aopesjtaonde raekening en eine Sjtierekop aan euver.